Ymunodd Dr Awel Vaughan-Evans, o'r Ysgol Seicoleg a Gwyddor Chwaraeon, â Croeso Cymru i egluro'r seicoleg y tu ôl i'r gair ‘hwyl’.
Eleni, mae ymwelwyr â Chymru’n cael eu hudo i brofi teimlad nad yw ar gael yn unman arall. Nid oes gan y gair ‘hwyl’ gyfieithiad uniongyrchol yn Saesneg, ac mae nifer o wahanol ddehongliadau, gyda’r dehongliad mwyaf poblogaidd yn fras yn golygu cyflwr dwfn o lawenydd sy’n deillio o ymgolli’n llwyr yn y foment.
Mae’r diffiniad yn golygu bod hwyl i’w gael mewn sefyllfaoedd sy’n golygu’r mwyaf i’r unigolyn neu grŵp, boed hynny’n archwilio canopi coedwig gyda ffrindiau, syllu ar y sêr dan awyr dywyll mewn twb awyr agored gyda rhywun arbennig, dawnsio drwy’r dydd a’r nos mewn gŵyl gerddoriaeth, syrffio ar y traeth a mwynhau sawna am yn ail, gwylio moment chwaraeon heb ei ail yn y cnawd, neu ddringo i’r awyr mewn balŵn aer poeth, gyda’r caeau gwyrdd a’r cestyll yn rholio oddi tanoch.
Mae Croeso Cymru hefyd wedi penodi Maxine Hughes, sy'n adnabyddus am esbonio'r Gymraeg i Ryan Reynolds a Rob McElhenney yn y rhaglen deledu boblogaidd, Welcome to Wrexham, i estyn gwahoddiad i ymwelwyr ledled y byd i 'deimlo'r hwyl'.
Yn 2016, daeth y byd yn ymwybodol o 'hygge', sef gair Sgandinafaidd sy’n golygu’r teimlad o foddhad clyd, ac mae wedi ysbrydoli llyfrau a theithiau, ac mae hyd yn oed wedi cyrraedd rhestr fer gair y flwyddyn yr Oxford English Dictionary. Ond nawr, mae Cymru’n gobeithio y bydd hyd yn oed mwy o bobl ledled y byd yn ymweld â’r wlad i brofi ei naws unigryw ei hun.
Wrth ddisgrifio’r effaith mae hwyl yn ei gael ar eich llesiant, dywedodd Dr Awel Vaughan-Evans, sy’n seicolegydd o Brifysgol ³Ô¹ÏȺÖÚ: “Y peth diddorol am hwyl yw ei fod yn dod yn fyw mewn amgylcheddau ymlaciol ac egnïol. Ar un llaw, gall hwyl ryddhau dopamin, tanio niwrodrosglwyddyddion a chodi curiad y galon, gan greu ymdeimlad o ewfforia sy’n parhau. Ar y llaw arall, gall eich arafu’n llwyr, gydag endorffinau’n lleihau straen, gan achosi'r corff cyfan i ymlacio. Yn y bôn, hwyl yw eich math arbennig chi o hapusrwydd.â€