�Թ�Ⱥ��

Ydych chi'n gweithio mewn amgylchedd dwys iawn? Mae'r rhaglen chwe wythnos Hunanofal Ystyriol wedi'i chynllunio i'ch helpu i ymdopi â gofynion a heriau unigryw gweithle dwys iawn gyda mwy o sefydlogrwydd, effeithiolrwydd a charedigrwydd. Bydd cyfranogwyr yn dysgu arferion ymwybyddiaeth ofalgar a thosturi syml ond pwerus sy'n gwella hunan-reoleiddio ac yn meithrin hunan-dosturi, gan eich galluogi i fod yn fwy tosturiol tuag atoch chi'ch hun ac eraill.

Mae'r rhaglen yn dyfnhau dealltwriaeth cyfranogwyr o ffisioleg straen, yn eich helpu i adnabod patrymau meddwl sy'n cynnal ac yn cynyddu straen, ac yn cyflwyno ffyrdd medrus, tosturiol o ymateb i bwysau yn y gweithle. Trwy atal chwythu plwc, gall y cwrs hwn fod yn sylfaen ar gyfer hunanofal gydol oes. Mae natur strwythuredig y cwrs, ynghyd ag arweiniad athrawes/athro profiadol a chefnogaeth cyd-gyfranogwyr, yn creu amgylchedd amhrisiadwy ar gyfer dysgu, magu hyder, a datblygu arferion sy’n gwella lles.

Mae'r rhaglen chwe wythnos Hunanofal Ystyriol wedi'i chynllunio'n benodol i’r rhai sy'n gweithio mewn amgylcheddau dwys iawn, dan gyfyngiadau amser. Mae'n adeiladu ymwybyddiaeth ac yn cryfhau'r gallu i adnabod straen ynddoch chi’ch hun, mewn eraill, ac yn systemau'r gweithle. 

Mae'r cwrs yn cyflwyno modelau damcaniaethol allweddol, gan gynnwys ffisioleg straen a seicoleg, therapi gwybyddol wedi’i seilio ar ymwybyddiaeth ofalgar, a hyfforddiant meddwl tosturiol, gan hefyd archwilio'r rhesymau pam y gallai'r rhai mewn proffesiynau gofal brofi chwythu plwc.
Bydd cyfranogwyr yn ymgysylltu ag arferion sy'n gwella ffocws, sefydlogrwydd a hunandosturi, gan eu helpu i ailgysylltu â'r hyn sydd bwysicaf yn eu gwaith. Mae'r egni newydd hwn nid yn unig yn cefnogi lles personol ond hefyd yn cyfrannu at ddiwylliant gweithle iachach a mwy cynaliadwy.

I bwy mae’r cwrs hwn yn addas?

Mae'r cwrs hwn wedi'i gynllunio ar gyfer gweithwyr proffesiynol sy'n gweithio mewn amgylcheddau dwys iawn, gan gynnwys gofal iechyd, addysg, gofal cymdeithasol, lleoliadau cyfreithiol, a sefydliadau trydydd sector. Os yw eich swydd yn cynnwys sefyllfaoedd pwysau uchel a gofynion emosiynol, bydd y rhaglen hon yn dysgu ffyrdd ymarferol i chi i wella gwytnwch a lles.

Pam astudio’r cwrs?

Mae'r Rhaglen Hunanofal Ystyriol wedi'i chynllunio'n benodol i gefnogi gweithwyr proffesiynol mewn gweithleoedd heriol. Trwy'r cwrs hwn, byddwch yn:

• Cael dealltwriaeth ddyfnach o straen a chwythu plwc a sut maent yn effeithio ar les.
• Datblygu sgiliau ymwybyddiaeth ofalgar a thosturi i ymateb yn fwy effeithiol i heriau yn y gweithle.
• Dysgu technegau ymarferol i wella ffocws, sefydlogrwydd emosiynol, a hunan-dosturi.
• Ailgysylltu â'r hyn sy'n wirioneddol bwysig yn eich gwaith, gan feithrin egni a chymhelliant o’r newydd.
• Symud y tu hwnt i ymdopi yn unig, ac yn hytrach, meithrin agwedd iachach a mwy cynaliadwy at eich bywyd proffesiynol.

Nid yw'r cwrs hwn yn ymwneud â rheoli straen yn unig - mae'n ymwneud â ffynnu yn eich swydd a chael effaith gadarnhaol ar eich gweithle.

Pa mor hir mae'n ei gymryd i gwblhau'r cwrs?

Mae’r cwrs byr hwn yn rhedeg dros 6 wythnos, ac yn cynnwys sesiynau ar-lein wythnosol sy’n para 75 munud.

Tiwtoriau

Bydd y cwrs hwn yn cael ei gyflwyno gan un o’n tiwtoriaid ymwybyddiaeth ofalgar arbenigol: Sarah Millband, Christina Shennan, neu Phoebe Roman. Mae pob un o’n tiwtoriaid yn ymarferwyr ymwybyddiaeth ofalgar hyfforddedig a phrofiadol iawn, gydag arbenigedd helaeth mewn cefnogi unigolion sy’n gweithio mewn amgylcheddau dwys iawn.

Mae Sarah Millband yn seicotherapydd, yn athrawes ymwybyddiaeth ofalgar, yn hyfforddwr ac yn oruchwyliwr. Mae’n addysgu ymwybyddiaeth ofalgar yn y Gwasanaeth Iechyd Gwladol i gleifion, myfyrwyr meddygaeth a staff clinigol ac yn y sector gwirfoddol i staff a gwirfoddolwyr, i ofalwyr a thrwy bartneriaethau presgripsiynu cymdeithasol. Mae Sarah yn byw yn Ne Cymru ac yn dysgu’r Rhaglen Hunanofal Ymwybyddiaeth Ofalgar mewn lleoliadau iechyd a gofal cymdeithasol i’r Ganolfan Ymchwil ac Ymarfer Ymwybyddiaeth Ofalgar ym Mhrifysgol �Թ�Ⱥ��.

Mae Christina yn diwtor ar y radd Meistr mewn Dulliau Seiliedig ar Ymwybyddiaeth Ofalgar yn y Ganolfan Ymchwil ac Ymarfer Ymwybyddiaeth Ofalgar (CMRP), Prifysgol �Թ�Ⱥ�� ac mae’n dysgu Rhaglen Hunanofal Ymwybyddiaeth Ofalgar i’r Brifysgol. Mae'n gweithio fel seicotherapydd ac athrawes ymwybyddiaeth ofalgar mewn Gwasanaethau Seicolegol yn y Gwasanaeth Iechyd Gwladol ac ym maes oncoleg. Mae gan Christina brofiad helaeth o gefnogi staff a gofalwyr, yn enwedig ym maes oncoleg, ac mae’n arwain gweithdai sy’n seiliedig ar ymwybyddiaeth ofalgar i weithwyr iechyd proffesiynol.

Mae Phoebe wedi gweithio yng ngwasanaethau gofal iechyd meddwl eilaidd y Gwasanaeth Iechyd Gwladol ers 1989. Mae’n arwain y modiwl Ymwybyddiaeth Ofalgar mewn Therapi Ymddygiad Dialectig ym Mhrifysgol �Թ�Ⱥ�� ac mae’n athrawes ac yn oruchwyliwr cyrsiau sy’n seiliedig ar ymwybyddiaeth ofalgar. Mae ganddi brofiad helaeth o gefnogi staff yn y Gwasanaeth Iechyd Gwladol gan gynnwys trwy raglenni ymwybyddiaeth ofalgar.

Beth fyddwch chi’n ei astudio ar y cwrs yma?

Mae’r cwrs byr hwn yn cyflwyno cysyniadau allweddol o ymwybyddiaeth ofalgar a thosturi, gan eich helpu i ddatblygu strategaethau ymarferol i reoli straen yn fwy effeithiol. Byddwch yn archwilio:

• Gwyddor straen: deall sut mae straen yn effeithio ar y corff a'r meddwl.
• Patrymau meddwl sy'n cyfrannu at straen a sut i'w hadnabod a chamu'n ôl oddi wrthynt.
• Technegau sy'n seiliedig ar ymwybyddiaeth ofalgar a thosturi i wella lles personol.
• Strategaethau i feithrin profiad gweithle iachach.

Erbyn diwedd y cwrs, bydd gennych becyn cymorth o ddulliau ymarferol i wella gwytnwch, ffocws, a lles cyffredinol yn eich bywyd proffesiynol a phersonol.

Beth mae dysgwyr yn ddweud am y cwrs? 

“mae'n wych sut dwi'n sylwi cymaint mwy ac yn gallu arafu a dewis fy ymateb i bethau”

“Gwnaeth i mi feddwl yn fwy cadarnhaol amdanaf fy hun a bywyd yn gyffredinol”

“Fe helpodd fi i ailasesu fy llwyth gwaith a chanolbwyntio ar bethau y gallaf eu rheoli.”

“Roedd cael lle diogel ac ymroddedig i rannu fy meddyliau a’m teimladau a chlywed gan eraill yn ddylanwadol ac wedi helpu i normaleiddio a rhesymoli rhai o’r pethau sy’n achosi straen i mi.”

 

£200 (pris yn ddilys ar gyfer blwyddyn academaidd 2025/26)

Nid oes dyddiad penodol ar gyfer y cwrs hwn eto.  Cofrestrwch eich diddordeb trwy gwblhau’r ffurflen isod a byddwn mewn cysylltiad yn fuan.